ព័ត៌មានសេដ្ឋកិច្ច ក្នុងនិងក្រៅប្រទេស

home latest
អាល្លឺម៉ង់គេចផុតពីការដើរថយក្រោយនៃសេដ្ឋកិច្ច

ក្រុងហ្វ្រេងហ្វឺត៖ ទិន្នន័យផ្លូវការបានបង្ហាញកាលពីថ្ងៃអង្គារថា អាល្លឺម៉ង់បានចៀសផុតពីការដើរថយក្រោយនៃសេដ្ឋកិច្ចកាលពីត្រីមាសទី៤ ឆ្នាំ២០១៨ ប៉ុន្តែបានទទួលរងនូវការថយចុះកំណើនសេដ្ឋកិច្ចខ្លាំងកាលពីឆ្នាំមុន ខណៈប្រទេសដែលមានសេដ្ឋកិច្ចធំបំផុតរបស់អឺរ៉ុបនេះបានធ្លាក់ចេញពីពេលវេលារីកចម្រើនខ្លាំង។ យោងតាមអាជ្ញាធរស្ថិតិសហព័ន្ធ Destatis កំណើនសេដ្ឋកិច្ចរបស់អាល្លឺម៉ង់បានធ្លាក់មកនៅត្រឹម ១,៥% ក្នុងឆ្នាំ២០១៨ ពីកំណើន ២,២% ដែលសម្រេចបានក្នុងរយៈពេល​២ឆ្នាំមុន។ អ្នកជំនាញខាងស្ថិតិបានរក​ឃើញថា ផ.ស.ស ឆ្នាំ២០១៨ របស់អាល្លឺម៉ង់ មានតម្លៃប្រមាណ ៣,៤ពាន់ពាន់លានអឺរ៉ូ (៣,៩ពាន់ពាន់លានដុល្លារ) ឬស្មើ ៤០ ៩០០ អឺរ៉ូក្នុងមនុស្សម្នាក់។

ប្រភពៈ ព័ត៌មានរបស់កាសែតភ្នំពេញប៉ុស្តិ៍ចេញផ្សាយថ្ងៃព្រហស្បតិ័ ទី១៧ ខែមករា ឆ្នាំ ២០១៩


ការវិនិយោគផ្ទាល់ពីបរទេសនៅចិនកើនឡើងខ្លាំង

ក្រុងប៉េកាំង៖ យោងតាមទិន្នន័យដែលចេញផ្សាយដោយក្រសួងពាណិជ្ជកម្មចិនបានឱ្យដឹងថា ការវិនិយោគ​ផ្ទាល់ពីបរទេស (FDI) របស់ចិននៅឆ្នាំ២០១៨ បានកើនឡើង ៣% ធៀបនឹងឆ្នាំ២០១៧ ដល់ ១៣៤,៩៧ពាន់លានដុល្លារ។ ក្រុមហ៊ុនសរុបចំនួន ៦០ ៥៣៣ក្រុមហ៊ុន ត្រូវបានបង្កើតឡើងថ្មីក្នុងប្រទេសចិនកាលពីឆ្នាំមុន កើនឡើងចំនួន ៦៩,៨% ធៀបនឹងឆ្នាំ២០១៧។ គ្រាន់តែនៅក្នុងខែធ្នូ ការវិនិយោគផ្ទាល់ពីបរទេសបានកើនឡើងដល់ ១៣,៧១ពាន់លានដុល្លារ ពោលគឺកើនឡើងចំនួន ២៣,២% ធៀបនឹងខែធ្នូ ឆ្នាំ២០១៧។

ប្រភពៈ ព័ត៌មានរបស់កាសែតភ្នំពេញប៉ុស្តិ៍ចេញផ្សាយថ្ងៃព្រហស្បតិ័ ទី១៧ ខែមករា ឆ្នាំ ២០១៩


វិស័យស្វាយចន្ទីវៀតណាមផ្តោតលើតម្លៃបន្ថែមឆ្នាំនេះ

ក្រុងហូជីមិញ៖ វិស័យស្វាយចន្ទីរបស់ប្រទេសវៀតណាមកំណត់គោលដៅនាំចេញចំនួន ៣៥០ ០០០តោន នៅឆ្នាំ២០១៩ ដែលធ្លាក់ចុះ ១០ភាគរយ ធៀបនឹងបរិមាណនាំចេញកាលពីឆ្នាំមុន។ សមាគមស្វាយចន្ទីវៀតណាម (Vinacas) បានឱ្យដឹងថា នៅឆ្នាំនេះ ប្រទេសវៀតណាមមានផែនការផ្តោតលើការអភិវឌ្ឍផលិតផលកែច្នៃខ្ពស់ និងការនាំចេញផលិតផលដែលមានតម្លៃបន្ថែមខ្ពស់។

ប្រភពៈ ព័ត៌មានរបស់កាសែតភ្នំពេញប៉ុស្តិ៍ចេញផ្សាយថ្ងៃអង្គារ ទី១៥ ខែមករា ឆ្នាំ ២០១៩


អតិរេកពាណិជ្ជកម្មពិភពលោករបស់ចិនធ្លាក់ចុះជាង ១៦ភាគរយ

ក្រុងប៉េកាំង៖ យោងតាមទិន្នន័យរបស់រដ្ឋបាលគយចិន ពាណិជ្ជកម្មសរុបបានកើនឡើងដល់ ៤,៦២ពាន់ពាន់លានដុល្លារ នៅឆ្នាំ២០១៨ ដែលកើន ១២,៦ភាគរយធៀបនឹងឆ្នាំ២០១៧។ ប៉ុន្តែអតិរេកពាណិជ្ជកម្មរបស់ប្រទេសនេះបានធ្លាក់ចុះ ១៦,២ភាគរយមកនៅត្រឹម ៣៥១,៧៦ពាន់លានដុល្លារ ដោយសារតែការនាំចូលបានកើនឡើង ១៥,៨ភាគរយ ខណៈដែលការនាំចេញបានកើនឡើងត្រឹមតែ ៩,៩ភាគរយ។

ប្រភពៈ ព័ត៌មានរបស់កាសែតភ្នំពេញប៉ុស្តិ៍ចេញផ្សាយថ្ងៃអង្គារ ទី១៥ ខែមករា ឆ្នាំ ២០១៩


GDP របស់ថៃអាចលូតលាស់បានតែ ៣,៨% ប៉ុណ្ណោះ

ក្រុងបាងកក៖ មជ្ឈមណ្ឌលព័ត៌មានសេដ្ឋកិច្ច (EIC) របស់ធនាគារ Siam Commercial Bank បានកាត់បន្ថយការព្យាករលើផលិតផលក្នុងស្រុកសរុប (GDP) របស់ប្រទេសថៃមកស្មើនឹង ៣,៨% ប៉ុណ្ណោះ ខណៈដែលមានកំណើនភាពមិនប្រាកដប្រជាក្នុងស្រុក និងនៅបរទេស។ យោងតាមការចេញផ្សាយពីសារព័ត៌មានបាងកកប៉ុស្តិ៍កាលពីថ្ងៃទី៩ ខែមករា បានស្រង់សម្តីរបស់លោក Yunyong Thaicharoen ដែលជាប្រធានសេដ្ឋវិទូ បានលើកឡើងថា ការនាំចេញរបស់ប្រទេសថៃនឹងលូតលាស់បានទាបជាងមុនដែលស្មើតែ ៣,៤% ប៉ុណ្ណោះក្នុងឆ្នាំ២០១៩ ទាបជាងការព្យាករមុនដែលស្មើ ៧% ព្រោះតែការអន់ថយនៃការលូតលាស់ជុំវិញពិភពលោក និងជម្លោះពាណិជ្ជកម្មរវាងសហរដ្ឋអាមេរិក និងប្រទេសចិន។

ប្រភពៈ ព័ត៌មានរបស់កាសែតកោះសន្តិភាពចេញផ្សាយថ្ងៃសុក្រ ទី១១ ខែមករា ឆ្នាំ ២០១៩


  • ការព្យាករពីកំណើនសេដ្ឋកិច្ចរបស់ធនាគារពិភពលោក
  • វាយនភណ្ឌបង់ក្លាដែសនៅមានឱកាសវិនិយោគច្រើន
  • ការនាំចេញរថយន្តរបស់ថៃនឹងកើនក្នុងកម្រិតតិចតួច
  • ឱនភាពថវិការបស់ថៃនឹងកើនឡើងដល់ ៤៥០ពាន់លានបាតជាថ្មីទៀត
  • សន្ទស្សន៍ផ្សារហ៊ុនធំៗនៅអាស៊ី
  • សេដ្ឋកិច្ចសិង្ហបុរីកើនទាបជាងការព្យាករ
  • ភ្ញៀវទេសចរទៅកាន់កូរ៉េខាងត្បូងកើនឡើង ២៣,៥% ក្នុងខែវិច្ឆិកា
  • ប្រាក់ចំណេញក្នុងវិស័យឧស្សាហកម្មរបស់ចិនកើនឡើង ១១,៨%
  • សេដ្ឋកិច្ចម៉ាឡេស៊ីនឹងលូតលាស់ចាប់ពីខែកុម្ភៈដល់ខែមេសា
  • ថៃអាចសម្រេចទិសដៅនាំចេញនៅឆ្នាំនេះ