ព័ត៌មានសេដ្ឋកិច្ច ក្នុងនិងក្រៅប្រទេស
home latest
ពាណិជ្ជកម្មទ្វេភាគីកម្ពុជា-ថៃ នៅតែរក្សាបានភាពល្អប្រសើរ
ភ្នំពេញ៖ ការធ្វើពាណិជ្ជកម្មឆ្លងកាត់ព្រំដែនរវាងកម្ពុជា និងថៃនៅតែមានកំណើនល្អ ទោះបីជាប្រទេសថៃបានប្រកាសបិទការធ្វើចរាចរណ៍ក្នុងប្រទេសនេះចាប់តាំងពីសប្ដាហ៍មុនក៏ដោយ។ យោងតាមកាសែតរបស់ថៃ The Nation ដែលបានរាយការណ៍កាលពីថ្ងៃទី១ ខែមេសា ដោយដកស្រង់សម្តីរបស់លោក Keerati Rushchano អគ្គនាយកនៃនាយកដ្ឋានពាណិជ្ជកម្មបរទេស (DFT) បានឲ្យដឹងថា ពាណិជ្ជកម្មឆ្លងព្រំដែនជាមួយកម្ពុជាមានចំនួន ៣៣,៩០៤ ពាន់លានបាត (១ ០៣៤,៧ លានដុល្លារ) កើនឡើង ១៥,៦៦ ភាគរយនៅរយៈពេល ២ខែដំបូងឆ្នាំនេះ ខណៈប្រទេសជិតខាងផ្សេងទៀតមានចំនួនសរុប ៧១,៣១៤ ពាន់លានបាត (៥ ២៣០ លានដុល្លារ) ធ្លាក់ចុះ ៦,៤៦ ភាគរយ។
ប្រភពៈ ព័ត៌មានរបស់គេហទំព័រកាសែតភ្នំពេញប៉ុស្តិ៍ចេញផ្សាយថ្ងៃពុធ ទី៨ ខែមេសា ឆ្នាំ២០២០
កម្ពុជានាំចេញជាង $១ពាន់លាន ទៅកាន់ទីផ្សារអាមេរិក
ភ្នំពេញ៖ របាយការណ៍បង្ហាញថា ចាប់ពីដើមខែមករារហូតដល់ចុងខែកុម្ភៈ កម្ពុជាបាននាំទំនិញទៅកាន់អាមេរិកមានតម្លៃសរុបជាង ១ ០៨៣ លានដុល្លារ កើនឡើង ៤៦,៩៦ ភាគរយបើធៀបនឹងរយៈពេលដូចគ្នាកាលពីឆ្នាំ២០១៩ ដែលមានតម្លៃត្រឹម ៧៣៧,១ លានដុល្លារ។ ក្នុងនោះការនាំចេញទំនិញពីកម្ពុជាទៅអាមេរិកក្នុងខែមករា មានកំណើន ៣៨,៥ ភាគរយ និងការនាំចេញក្នុងខែកុម្ភៈមានកំណើន ៥៧,១ ភាគរយ។
ប្រភពៈ ព័ត៌មានរបស់គេហទំព័រកាសែតភ្នំពេញប៉ុស្តិ៍ចេញផ្សាយថ្ងៃពុធ ទី៨ ខែមេសា ឆ្នាំ២០២០
វិនិយោគិនក្នុងស្រុកបោះទុនជាង $១៦០ លាន លើរោងចក្រស្រាបៀរ
ភ្នំពេញ៖ ក្រុមប្រឹក្សាអភិវឌ្ឍន៍កម្ពុជាកាលពីសប្តាហ៍មុនបានសម្រេចអនុម័តលើគម្រោងសាងសង់រោងចក្រផលិតស្រាបៀរ និងភេសជ្ជៈមួយដែលស្ថិតនៅក្នុងស្រុកអង្គស្នួល ខេត្តកណ្តាល។ គម្រោងដែលមានទុនវិនិយោគ ១៦០,៦លានដុល្លារ និងអាចបង្កើតការងារបាន ១ ៥៤៥ កន្លែងនេះ គឺជាការវិនិយោគរបស់ក្រុមហ៊ុន Hanuman Beverages Co., Ltd។
ប្រភពៈ ព័ត៌មានរបស់គេហទំព័រកាសែតភ្នំពេញប៉ុស្តិ៍ចេញផ្សាយថ្ងៃអង្គារ ទី៧ ខែមេសា ឆ្នាំ២០២០
ធនាគារសហគ្រាសធុនតូច និងមធ្យមចាប់បើកដំណើរការ
ភ្នំពេញ៖ ធនាគារសហគ្រាសធុនតូច និងមធ្យមកម្ពុជា (ផ.ស.ក) ដែលជាធនាគារគ្រប់គ្រងដោយរដ្ឋមានដើមទុនដំបូង ១០០ លានដុល្លារ បានដាក់ឲ្យដំណើរការជាផ្លូវការហើយកាលពីថ្ងៃសុក្រ ក្នុងគោលបំណងដើម្បីផ្តល់នូវមូលនិធិសម្រាប់ជួយពង្រឹងដល់ចង្វាក់ផលិតកម្ម និងភាពប្រកួតប្រជែងរបស់អ្នកនៅក្នុងវិស័យនេះឲ្យកាន់តែមានភាពរឹងមាំជាងពេលមុន។ គម្រោងសហហិរញ្ញប្បទានទ្រទ្រង់សហគ្រាសធុនតូច និងមធ្យមនេះបង្កើតឡើងក្នុងគោលបំណងផ្តល់ឥណទានមានការប្រាក់ទាប ដើម្បីជំរុញការអភិវឌ្ឍសហគ្រាសធុនតូច និងមធ្យមក្នុងវិស័យអាទិភាព រួមមានផ្នែកកម្មន្តសាល និងសិប្បកម្ម។
ប្រភពៈ ព័ត៌មានរបស់គេហទំព័រកាសែតភ្នំពេញប៉ុស្តិ៍ចេញផ្សាយថ្ងៃចន្ទ ទី៦ ខែមេសា ឆ្នាំ២០២០
កម្ពុជានាំចេញជ័រកៅស៊ូធ្លាក់ជិត ៥០ភាគរយ ក្នុងខែកុម្ភៈ
ភ្នំពេញ៖ រដ្ឋាភិបាលបានធ្វើការកែសម្រួលតម្លៃសេវាសាធារណៈចំនួន ៣ ប្រភេទ ដើម្បីជំរុញការចុះបញ្ជីពាណិជ្ជកម្ម និងជំរុញការវិនិយោគទាំងក្នុងស្រុក និងក្រៅស្រុកផងដែរ។ បើយោងតាមប្រកាសរបស់អន្តរក្រសួងគឺក្រសួងសេដ្ឋកិច្ច និងហិរញ្ញវត្ថុ និងក្រសួងពាណិជ្ជកម្មបានឲ្យដឹងថា រដ្ឋាភិបាលសម្រេចកែសម្រួលតម្លៃសេវាសាធារណៈលើប្រភេទសេវាចំនួន ៣ គឺការស្នើសុំចុះឈ្មោះនៅក្នុងបញ្ជីពាណិជ្ជកម្មរបស់ក្រុមហ៊ុនពាណិជ្ជកម្ម ដែលតម្លៃសេវាថ្មី ១ ០១០ ០០០ រៀល ខណៈកាលពីមុនមានតម្លៃ ១ ៦៨០ ០០០ រៀល។ រីឯសហគ្រាសឯកត្តបុគ្គល ឬពាណិជ្ជករត្រូវបានចុះបញ្ជីក្នុងតម្លៃត្រឹម ១៨០ ០០០ រៀល ចុះតម្លៃពី ៣០០ ០០០ រៀល និងការពិនិត្យនាមករណ៍ក្រុមហ៊ុន សហគ្រាសមានតម្លៃ ២៥ ០០០ រៀលចុះពី ៤០ ០០០ រៀល។ ប្រកាសនេះឲ្យដឹងថា សេចក្តីសម្រេចនេះចាប់អនុវត្តចាប់ពីថ្ងៃទី ១ ខែមេសា តទៅ។
ប្រភពៈ ព័ត៌មានរបស់គេហទំព័រកាសែតភ្នំពេញប៉ុស្តិ៍ចេញផ្សាយថ្ងៃចន្ទ ទី៦ ខែមេសា ឆ្នាំ២០២០