ព័ត៌មានសេដ្ឋកិច្ច ក្នុងនិងក្រៅប្រទេស
home latest
ដើម្បីទាក់ទាញទេសចរចិន កម្ពុជានឹងពង្រឹងជើងហោះហើរត្រង់បន្ថែមទៀតទៅកាន់គោលដៅសំខាន់ៗរបស់ចិន
ភ្នំពេញ៖ កម្ពុជាបានកំណត់យកទេសចរជនជាតិចិន ជាគោលដៅចម្បងក្នុងការទាក់ទាញមកទស្សនានៅតាមតំបន់រមណីយដ្ឋាននានាក្នុងប្រទេសកម្ពុជា ដូច្នេះហើយទើបថ្នាក់ដឹកនាំប្រទេសកម្ពុជាកំពុងជំរុញការចរចារជាមួយភាគីចិនក្នុងការបើកជើងហោះហើរត្រង់-មក រវាងកម្ពុជាចិន។ ជាពិសេសរាជរដ្ឋាភិបាលក៏បានជំរុញឱ្យក្រុមហ៊ុនអាកាសចរក្នុងស្រុកពង្រីកជើងហោះហើរបន្ថែមទៀតទៅកាន់គោលដៅប្រទេសចិន ដើម្បីនាំទេសចរ និងវិនិយោគិនមកកម្ពជា។
ប្រភពៈ ព័ត៌មានរបស់កាសែតកោះសន្តិភាព ចេញផ្សាយថ្ងៃចន្ទ ទី២៦ ខែសីហា ឆ្នាំ ២០១៩
SME ជាផ្នែកដ៏សំខាន់ក្នុងការជំរុញកំណើនវិស័យឧស្សាហកម្ម
ភ្នំពេញ៖ ក្រសួងឧស្សាហកម្ម និងសិប្បកម្មបានឱ្យដឹងថា សហគ្រាសធុនតូច និងមធ្យម (SME) ជាផ្នែកដ៏សំខាន់ក្នុងការជំរុញកំណើនវិស័យឧស្សាហកម្មកម្ពុជាដែលនឹងជួយឱ្យ រដ្ឋាភិបាលអាចសម្រេចបានផែកការប្រែក្លាយកម្ពុជាទៅជាប្រទេសមានប្រាក់ចំណូលមធ្យមកម្រិតខ្ពស់ក្នុងឆ្នាំ២០៣០ និងប្រាក់ចំណូលខ្ពស់ក្នុងឆ្នាំ២០៥០។ រដ្ឋាភិបាលក៏បានលើកទឹកចិត្តឱ្យក្រុមហ៊ុនប្រភេទ SME ទៅចុះបញ្ជី ដើម្បីទទួលបានអត្ថប្រយោជន៍។
ប្រភពៈ ព័ត៌មានរបស់កាសែតភ្នំពេញ ប៉ុស្តិ៍ ចេញផ្សាយថ្ងៃចន្ទ ទី២៦ ខែសីហា ឆ្នាំ ២០១៩
EU-BMZ ជួយកម្ពុជាពង្រឹងសមាហរណកម្មសេដ្ឋកិច្ច
ភ្នំពេញ៖ សហភាពអ៊ឺរ៉ុប និងក្រសួងសហប្រតិបត្តិការ និងអភិវឌ្ឍន៍សហព័ន្ធអាល្លឺម៉ង (BMZ) ប្តេជ្ញាជួយពង្រឹងដល់ការធ្វើសមាហរណកម្មសេដ្ឋកិច្ចកម្ពុជាជាមួយអាស៊ានដោយបានផ្តល់ហិរញ្ញប្បទាន៩,៣៥លានអឺរ៉ូ ដើម្បីជំរុញពាណិជ្ជកម្ម និងវិនិយោគកម្ពុជាក្នុងតំបន់។ គម្រោងនេះជាការផ្តល់ហិរញ្ញប្បទានរួមគ្នាពីសហភាពអឺរ៉ុប និង BMZ ដែលអនុវត្តដោយ GIZ របស់អាល្លឺម៉ង់ពីឆ្នាំ២០១៩ ដល់ឆ្នាំ២០២៣។
ប្រភពៈ ព័ត៌មានរបស់កាសែតភ្នំពេញ ប៉ុស្តិ៍ ចេញផ្សាយថ្ងៃចន្ទ ទី២៦ ខែសីហា ឆ្នាំ ២០១៩
ចំណូលពន្ធដាររយៈពេល ៧ខែកើនជាង២៨%
ភ្នំពេញ៖ របាយការណ៍ក្នុងកិច្ចប្រជុំបូកសរុបលទ្ធផលការងារប្រមូលចំណូលពន្ធប្រចាំខែ កក្កដា របស់អគ្គនាយកដ្ឋានពន្ធដារបានឱ្យដឹងថា ក្នុងរយៈពេល៧ខែ ចំណូលពន្ធអាករដែលប្រមូលបានមានចំនួន ១,៧៣ពាន់លានដុល្លារកើនឡើង ២៨,០៨% បើធៀបនឹងរយៈពេលដូចគ្នាកាលពីឆ្នាំ២០១៨ ដែលមាន ១,៥២ពាន់លានដុល្លារ។ បើគិតពីផែនការប្រចាំឆ្នាំ គឺសម្រេចបាន ៧៥,៥២%។
ប្រភពៈ ព័ត៌មានរបស់កាសែតភ្នំពេញ ប៉ុស្តិ៍ ចេញផ្សាយថ្ងៃសុក្រ ទី២៣ ខែសីហា ឆ្នាំ ២០១៩
គម្រោងផ្សារទំនើប ONE MALL នឹងបើកនៅចុងឆ្នាំនេះ
ភ្នំពេញ៖ The One Mall ដែលជាផ្សារទំនើបវិនិយោគដោយក្រុមហ៊ុនចិន កម្ពស់៣ជាន់ នៅទីក្រុងភ្នំពេញនឹងបើកដំណើរការជាផ្លូវការនៅខែធ្នូ ឆ្នាំ២០១៩ នេះ ដែលបច្ចុប្បន្នគម្រោងនេះកំពុងដំណើរការសាងសង់ នឹងគ្រោងបញ្ចប់ក្នុងខែតុលា។ The One Mall មានហាងលក់ទំនិញ កន្លែងក្មេងលេង កន្លែងហាត់ប្រាណ កន្លែងញុំាអាហារ និងហាងលក់សំលៀកបំពាក់ជាដើម។
ប្រភពៈ ព័ត៌មានរបស់កាសែតភ្នំពេញ ប៉ុស្តិ៍ ចេញផ្សាយថ្ងៃសុក្រ ទី២៣ ខែសីហា ឆ្នាំ ២០១៩