ព័ត៌មានសេដ្ឋកិច្ច ក្នុងនិងក្រៅប្រទេស

home latest
ការនាំចេញទំនិញពីកម្ពុជាទៅទីផ្សារអាមេរិក កើនជិត ២៣ ភាគរយ

ភ្នំពេញ៖​ ការបន្ត​អូសបន្លាយ​ពេល​ជាង​ ១ ​ឆ្នាំ​នៃ​ការឆ្លង​រាលដាល​ជំងឺ​ផ្តាសាយ​សកល​កូវីដ​-១៩ មិនបាន​ធ្វើឱ្យ​ការនាំ​ចេញពី​កម្ពុជា​ទៅ​ទីផ្សារ​អាមេរិក​ធ្លាក់ចុះ​ទេ ដោយ​ទិន្នន័យ​បង្ហាញ​ថា រយៈពេល ១២ ​ខែ ឆ្នាំ​ ២០២០ ការនាំ​ទំនិញ​កម្ពុជា​ទៅ​អាមេរិក​មាន​តម្លៃ​ជាង ៦,៥ ​ពាន់​លាន​ដុល្លារ​កើន​ជិត ២៣ ​ភាគរយ​បើ​ធៀប​ទៅនឹង​ឆ្នាំ​ ២០១៩ ខណៈ​ទំហំ​ពាណិជ្ជកម្ម​ទ្វេភាគី​មានតម្លៃ​ជិត ៧ ​ពាន់​លាន​ដុល្លារ​។ នេះ​បើតាម​ទិន្នន័យ​ពី​ការិយាល័យ​ពាណិជ្ជកម្ម​អាមេរិក​។ ទិន្នន័យ​ទើប​ចេញផ្សាយ​ចុងសប្តាហ៍​មុន​បង្ហាញ​ថា ចាប់ពី​ខែមករា ដល់​ដំណាច់​ខែធ្នូ ឆ្នាំ​ ២០២០ កម្ពុជា​នាំចេញ​ទំនិញ​ទៅ​ទីផ្សារ​អាមេរិក​នៅក្នុង​តម្លៃ​សរុប ៦ ៥៧៧,៧ ​លាន​ដុល្លារ​កើន ២២,៧៩ ​ភាគរយ​ពី​ចំនួន ៥ ៣៥៦,៨ ​លាន​ដុល្លារ​នៅក្នុង​ឆ្នាំ​ ២០២០ ដែល​ធ្វើឱ្យ​ទំហំ​ពាណិជ្ជកម្ម​សរុប​ប្រទេស​ទាំង​ ២ មាន​តម្លៃ ៦ ៩២១,៣ ​លាន​ដុល្លារ កើន ១៧,៨៩ ​ភាគរយ​។

ប្រភពៈ ព័ត៌មានកាសែតភ្នំពេញប៉ុស្តិ៍ចេញផ្សាយថ្ងៃចន្ទ ទី០៨ ខែកុម្ភ: ឆ្នាំ២០២១


សហគ្រិនស្ត្រី ប្រឈមការទទួលបានហិរញ្ញប្បទានអាជីវកម្មដោយកត្តាច្រើន

ភ្នំពេញ៖  មន្ត្រី​ជាន់ខ្ពស់​របស់​ធនាគារ​ជាតិ​នៃ​កម្ពុជា​ (NBC) ​បាន​ថ្លែងថា បញ្ហា​កង្វះ​ព័ត៌មាន​អំពី​សេវា និង​ផលិតផល​ហិរញ្ញវត្ថុ​មិន​មាន​លទ្ធភាព​ក្នុង​ការបំពេញ​តាម​លក្ខខណ្ឌ​តម្រូវ​នានា និង​ខ្វះ​ការយល់ដឹង​ផ្នែក​ហិរញ្ញវត្ថុ​គឺជា​ឧបសគ្គ​ចម្បង​ដែល​បាន​រារាំង​សហគ្រិន​ស្ត្រី​ក្នុង​ការទទួល​បាន​ហិរញ្ញប្បទាន​សម្រាប់​ពង្រីក​អាជីវកម្ម​របស់​ពួកគេ​។ ការថ្លែង​បែបនេះ​ត្រូវធ្វើ​ឡើង​ដោយ​លោក រ័ត្ន សុវណ្ណនរៈ អគ្គនាយក​ត្រួតពិនិត្យ ធនាគារជាតិ​នៃ​កម្ពុជា​ក្នុង​វេទិកា​ប្រព័ន្ធ​អេកូឡូស៊ី​សហគ្រិនភាព ក្រោម​ប្រធានបទ «​លទ្ធភាព​ទទួលបាន​ហិរញ្ញប្បទាន​សម្រាប់​សហគ្រិន​ស្ត្រី​ក្នុង​សម័យកាល​កូវីដ​១៩» ដែល​ប្រព្រឹត្ត​ទៅ​កាលពី​ថ្ងៃ​ព្រហស្បតិ៍​សប្តាហ៍​មុន ក្រោម​កិច្ចសហការ​រៀបចំ​ដោយ​ធនាគារជាតិ​នៃ​កម្ពុជា​សហគ្រិន​ខ្មែរ Swisscontact និង Good Return​។

ប្រភពៈ ព័ត៌មានកាសែតភ្នំពេញប៉ុស្តិ៍ចេញផ្សាយថ្ងៃចន្ទ ទី០៨ ខែកុម្ភ: ឆ្នាំ២០២១


កម្ពុជា-កូរ៉េខាងត្បូង នឹងចុះហត្ថលេខាលើ FTA ទ្វេភាគីនៅពាក់កណ្តាលឆ្នាំនេះ

ភ្នំពេញ៖​ ព្រះរាជាណាចក្រ​កម្ពុជា និង​សាធារណរដ្ឋ​កូរ៉េ​បានប្រកាស​រួមគ្នា​បញ្ចប់​កិច្ចចរចា​កិច្ចព្រមព្រៀង​ពាណិជ្ជកម្ម​សេរី​ទ្វេភាគី​ (CKFTA) ​នៅ​ថ្ងៃ​ពុធ​បន្ទាប់ពី​ការចរចា​ ៣ ​លើក​រួច​ដោយ​ប្រើពេល​កន្លះ​ឆ្នាំ​ចាប់ពី​ខែកក្កដា ឆ្នាំ​ ២០២០ ដើម្បី​បើកផ្លូវ​ឱ្យមាន​កិច្ចព្រមព្រៀង​ពាណិជ្ជកម្ម​សេរី​ទ្វេភាគី​ផ្លូវការ ដោយ​រដ្ឋាភិបាល​ទាំង​ ២ ​រំពឹង​ចុះ​ហត្ថលេខា​នៅ​ពាក់កណ្តាល​ឆ្នាំនេះ ដែលជា​ផ្នែក​មួយ​នៃ​ការពង្រីក ទីផ្សារ និង​បង្កើន​ការនាំចេញ​។ កម្ពុជា​នឹង​នាំចេញ​ទំនិញ​មួយ​ចំនួន​ទៅកាន់​ទីផ្សារ​កូរ៉េ​ក្នុង​អត្រាពន្ធ​សូន្យ​។​ លោក ប៉ាន សូរស័ក្តិ រដ្ឋមន្ត្រីក្រសួង​ពាណិជ្ជកម្ម​កម្ពុជា និង​លោកស្រី Yoo Myung-hee រដ្ឋមន្ត្រីក្រសួង​ពាណិជ្ជកម្ម​នៃ​សាធារណរដ្ឋ​កូរ៉េ​បាន​ចុះ​ហត្ថលេខា​លើ​កិច្ចព្រមព្រៀង​បញ្ចប់​កិច្ចចរចា​នេះ​នៅ​ថ្ងៃទី​ ៣ ខែកុម្ភៈ ដែល​ធ្វើឡើង​តាម​ប្រព័ន្ធ​វីដេអូ​អនឡាញ​។

ប្រភពៈ ព័ត៌មានកាសែតភ្នំពេញប៉ុស្តិ៍ចេញផ្សាយថ្ងៃព្រហស្បតិ៍ ទី០៤ ខែកុម្ភ: ឆ្នាំ២០២១


កម្ពុជា រំពឹងពង្រីកទំនាក់ទំនងសេដ្ឋកិច្ចជាមួយ ឥណ្ឌា

ភ្នំពេញ៖  អនុប្រធាន​សភាពាណិជ្ជកម្ម​កម្ពុជា​បាន​ថ្លែងថា​​កម្ពុជា​អាច​ចាប់យក​ទីផ្សា​ឥណ្ឌា​​ ដើម្បី​ពង្រីក​ទំនាក់ទំនង​ពាណិជ្ជកម្ម​ និង​វិនិយោគ​បន្ថែមទៀត​ ​ខណៈដែល​ទំហំ​ដោះដូរ​ទំនិញ​នៅ​ទាប​នៅឡើយ​។  លោក លឹម ហេង ដែល​បានទទួល​ការអញ្ជើញ​ចូលរួម​នៅ​​ក្នុង​ពិព័រណ៍ និង​កិច្ចប្រជុំ​កំពូល​ថែរក្សា​សុខភាព​ឥណ្ឌា និង​អាស៊ាន​» តាម​អនឡាញ​ដែល​នឹង​ប្រព្រឹត្តទៅ​ចាប់ពី​ថ្ងៃទី​ ២២ ដល់​ថ្ងៃទី​ ២៤ ខែកុម្ភៈ ឆ្នាំ​ ២០២១ ​បាន​ប្រាប់​ភ្នំពេញ​ប៉ុស្ដិ៍​ថា លោក​បាន​ជូនដំណឹង​រួចហើយ​ដល់​សមាជិក​របស់លោក​ឱ្យ​ចូលរួម​ក្នុង​ព្រឹត្តិការណ៍​ពាណិជ្ជកម្ម​ជាពិសេស​នេះ​។ លោក​លើកឡើង​ថា​៖ «​ខ្ញុំ​មើលឃើញថា ទំនាក់ទំនង​សេដ្ឋកិច្ច​របស់​យើង​ជាមួយ​ប្រទេស​ឥណ្ឌា មិនទាន់​ធំ​នៅឡើយ​ទេ ប៉ុន្តែ​នៅពេល​នេះ​រដ្ឋាភិបាល​កំពុង​បន្តធ្វើ​ការងារ​សម្រាប់​ការបើកចំហ​ការចរចា កិច្ចព្រមព្រៀង​ពាណិជ្ជកម្ម​សេរី​ជាមួយ​ប្រទេស​ឥណ្ឌា​។ ខ្ញុំ​ជឿជាក់​ថា សមាជិក​ជាច្រើន​នឹង​ធ្វើជា​ដៃគូ​ជាមួយ​ក្រុមហ៊ុន​របស់​ប្រទេស​ឥណ្ឌា​លើ​ការនាំចូល​ការផ្គត់ផ្គង់​វេជ្ជសាស្ដ្រ និង​ឱសថ​នៅទីនេះ​ផងដែរ​»​។

ប្រភពៈ ព័ត៌មានកាសែតភ្នំពេញប៉ុស្តិ៍ចេញផ្សាយថ្ងៃព្រហស្បតិ៍ ទី០៤ ខែកុម្ភ: ឆ្នាំ២០២១


រដ្ឋបន្តរក្សាការយកថ្លៃទិដ្ឋាការពីភ្ញៀវទេសចរបរទេស

ភ្នំពេញ៖​ កម្ពុជា​នឹង​បន្ត​យក​ថ្លៃ​ទិដ្ឋាការ​ពី​ជនបរទេស​ដែល​ធ្វើដំណើរ​មក​កម្ពុជា​ដដែល បើ​ទោះ​មាន​សំណើ​ពី​អ្នក​នៅក្នុង​វិស័យ​ទេសចរណ៍​ចង់ឱ្យ​រដ្ឋាភិបាល​ទម្លាក់ចោល​ការយក​ថ្លៃ​លើ​សេវា​នេះ​ក្នុង​ក្តី​រំពឹងថា​នឹង​អាច​ស្រូប​ទាញ​កំណើន​ភ្ញៀវទេសចរ​បរទេស​ឡើងវិញ​ពី​ការធ្លាក់ចុះ​យ៉ាង​គំហុក​ចាប់តាំងពី​ការផ្ទុះ​ឡើង​ជំងឺ​កូវីដ​ ១៩ រហូត​មក​ដល់​ពេលនេះ​។ ការសម្រេច​បន្ត​យក​ថ្លៃ​ទិដ្ឋាការ​នេះ​ត្រូវ​បាន​លោក​នាយករដ្ឋមន្ត្រី ហ៊ុន សែន លើកឡើង​ក្នុង​ពិធីបើកការដ្ឋាន​សាងសង់​រោងចក្រ​ប្រព្រឹត្តិកម្ម​ទឹកស្អាត​បាក់​ខែង និង​សម្ពោធ​រោងចក្រ​ប្រព្រឹត្តិកម្ម​ទឹកស្អាត​ចំការមន​កាលពី​ថ្ងៃ​ចន្ទ​កន្លងមក​។ លោក ហ៊ុន សែន បាន​លើកឡើង​ថា លោក​មិន​យល់ស្រប​ចំពោះ​សំណើ​មួយចំនួន​ដែល​ចង់ឱ្យ​រដ្ឋាភិបាល​បញ្ឈប់​ការយក​ថ្លៃ​ទិដ្ឋាការ​ពី​ភ្ញៀវ​បរទេស ដើម្បី​ទាញយក​ភ្ញៀវ​បរទេស​ឡើយ ព្រោះ​ចំណូល​នេះ​គឺជា​ផ្នែក​មួយ​ដែល​បាន​ចូលរួម​ជួយ​ទ្រទ្រង់​ការអភិវឌ្ឍ​ប្រទេសជាតិ ហើយ​កម្ពុជា​ក៏​នៅ​មិនទាន់​មាន​ប្រភព​ចំណូល​អ្វី​យកមក​ជំនួស​ដែរ​។ លោក​បន្តថា ការកំណត់​យក​ថ្លៃ​ទិដ្ឋាការ​ពី​ជនបរទេស​គឺ​មិនមែន​មានតែ​កម្ពុជា​ទេ សូម្បី​ប្រទេស​រីកចម្រើន​ដូចជា​បារាំង ក៏​នៅតែ​យក​ថ្លៃ​ទិដ្ឋាការ​ចូល​ប្រទេស​គេ​ដែរ ហើយ​ថែមទាំង​មានតម្លៃ​ខ្ពស់​ទៀតផង​។

ប្រភពៈ ព័ត៌មានកាសែតភ្នំពេញប៉ុស្តិ៍ចេញផ្សាយថ្ងៃពុធ ទី០៣ ខែកុម្ភ: ឆ្នាំ២០២១


  • គម្រោងទាញយករ៉ៃមាសដំបូង នឹងចាប់ផ្តើមនៅត្រីមាសទី២
  • ពាណិជ្ជកម្មទ្វេភាគីកម្ពុជា-ថៃ ឆ្នាំ ២០២០ ធ្លាក់ចុះជាង ២៣%
  • រោងចក្រអគ្គិសនីពីពន្លឺព្រះអាទិត្យកម្លាំង ៤០ មេហ្គាវ៉ាត់ គ្រោងសង់នៅខេត្តកំពង់ឆ្នាំង
  • ប្រេងឆៅជាង ៤ ម៉ឺនបារ៉ែលបានបូមចេញពីបាសាំងខ្មែរប្លុក A
  • អង្ករនាំទៅចិនកើន ខណៈការនាំចេញសរុបធ្លាក់ចុះ
  • PPWSA ពង្រីកការវិនិយោគជិត $៤០០ លាន លើគម្រោងរោងចក្រទឹកស្អាតបាក់ខែង
  • កិច្ចព្រមព្រៀងមិនយកពន្ធត្រួតស៊ីគ្នារវាងកម្ពុជា-កូរ៉េខាងត្បូង ចូលជាធរមាន
  • ភាគី ៣ ចុះកិច្ចព្រមព្រៀងជំរុញទីផ្សារផលិតផលខ្មែរតាមប្រព័ន្ធបច្ចេកវិទ្យា
  • វិស័យហិរញ្ញវត្ថុនៅកម្ពុជា នឹងមិនប្រឈមនឹងកង្វះប្រាក់សម្រាប់កម្ចីឡើយ
  • រដ្ឋាភិបាលនឹងជំរុញការនាំចេញវិស័យកម្មន្តសាល មិនមែនកាត់ដេរក្នុងឆ្នាំនេះ