ព័ត៌មានសេដ្ឋកិច្ច ក្នុងនិងក្រៅប្រទេស

home latest
CBC សហការជាមួយ TCBC ដើម្បីជំរុញកំណើនពាណិជ្ជកម្ម
ភ្នំពេញ៖ ក្រុមប្រឹក្សាធុរកិច្ចកម្ពុជា (CBC) ដែលស្ថិតនៅក្រោមការគ្រប់គ្រងរបស់ស្ថានទូតកម្ពុជាប្រចាំទីក្រុងបាងកក ប្រទេសថៃ បានសហការជាមួយក្រុមប្រឹក្សាពាណិជ្ជកម្មថៃ និងកម្ពុជា (TCBC) របស់ប្រទេសថៃដើម្បីជួយសម្រួលពាណិជ្ជកម្មឆ្លងកាត់ព្រំដែនរវាងប្រទេសទាំង ២ ក្នុងអំឡុងពេលដ៏ពិបាកដោយសារការរីករាលដាលជំងឺកូវីដ ១៩ ដែលធ្វើឱ្យពាណិជ្ជកម្មទ្វេភាគីរវាងប្រទេសទាំង ២ ធ្លាក់ចុះកាលពីឆ្នាំមុន។លោក អ៊ូក សោភ័ណ ឯកអគ្គរាជទូតកម្ពុជាប្រចាំប្រទេសថៃកាលពីថ្ងៃទី ១ ខែមីនា បានជួបជាមួយក្រុមគណៈប្រតិភូនៃក្រុមប្រឹក្សាពាណិជ្ជកម្មថៃ និងកម្ពុជា (TCBC) ដែលដឹកនាំដោយលោក Chanitr Charn-chainarong ប្រធានក្រុមប្រឹក្សានេះដើម្បីពិភាក្សាពីការរីកចម្រើនគម្រោងអភិវឌ្ឍន៍ពាណិជ្ជកម្ម និងការវិនិយោគក្នុងឆ្នាំ ២០២១ នេះ។

ប្រភពៈ ព័ត៌មានកាសែតភ្នំពេញប៉ុស្តិ៍ចេញផ្សាយថ្ងៃព្រហស្បតិ៍ ទី០៤ ខែមីនា ឆ្នាំ២០២១


ការរៀបចំឥណទានឡើងវិញមានតម្លៃជាង $១,៣ ពាន់លាន

ភ្នំពេញ៖  ចំនួន​នៃ​ការរៀបចំ​ឥណទាន​ឡើងវិញ​នៅ​គ្រឹះស្ថាន​ហិរញ្ញវត្ថុ​នៅ​កម្ពុជា​មាន​ចំនួន ២៨៩ ៤២២ ​នាក់​ដែល​ស្មើនឹង​តម្លៃ ១ ៣៩៧ ​លាន​ដុល្លារ គិត​ត្រឹម​ខែ​កុម្ភៈ ខណៈ​អ្នក​នៅក្នុង​ឧស្សាហកម្ម​នេះ​បានឱ្យ​ដឹងថា ការស្នើសុំ​កំពុង​ធ្លាក់ចុះ​។  ធនាគារជាតិ​នៃ​កម្ពុជា​ (NBC) កាលពី​ខែមីនា ឆ្នាំ​ ២០២០ បានចេញ​សារាចរណ៍​មួយ​ដល់​គ្រឹះស្ថាន​ហិរញ្ញវត្ថុ​ទាំងអស់​ឱ្យ​រៀបចំ​ឥណទាន​ឡើងវិញ​ក្នុង​វិស័យ​អាទិភាព​ចំនួន​ ៤ គឺ​ទេសចរណ៍ កាត់ដេរ សំណង់ ការដឹកជញ្ជូន និង​ឡូជីស្ទិក ដែល NBC ចាត់ទុក​ថា ជា​វិស័យ​ទទួលរង​ផលប៉ះពាល់​ខ្លាំង​បំផុត​ពី​ការរីករាលដាល​ជំងឺ​កូវីដ​ ១៩​។

ប្រភពៈ ព័ត៌មានកាសែតភ្នំពេញប៉ុស្តិ៍ចេញផ្សាយថ្ងៃព្រហស្បតិ៍ ទី០៤ ខែមីនា ឆ្នាំ២០២១


អាមេរិកផ្តល់ជំនួយ $៣,៥ លានសម្រាប់កម្មវិធីប្រកួតប្រជែងក្នុងវិស័យកសិកម្ម

ភ្នំពេញ៖   រដ្ឋាភិបាល​អាមេរិក​តាមរយៈ​ទីភ្នាក់ងារ​ជំនួយ​អាមេរិក ( USAID) ​បានផ្តល់​ទឹកប្រាក់​ ៣,៥ ​លាន​ដុល្លារ​ ដល់​វិស័យ​ឯកជន​ដើម្បី​រៀបចំ​បង្កើត​ការប្រកួតប្រជែង​ថ្មី​មួយ​ក្នុង​ផ្នែក​កសិកម្ម​នៅ​កម្ពុជា​ទាក់ទង​នឹង​បញ្ហា​ប្រឈម​សំខាន់ៗ ដូចជា​ការប្រើប្រាស់​ប្រព័ន្ធ​រក្សា​ភាពត្រជាក់​លទ្ធភាព​ក្នុង​ការទុកដាក់​ក្នុង​ឃ្លាំង និង​ផ្នែក​ភ័ស្ដុភារ​។​ វិស័យ​ឯកជន​ស្វាគមន៍​គំនិត​ផ្ដួចផ្ដើម​នេះ​ដែល​នឹង​រួមចំណែក​ដល់​ការកែលម្អ​ចង្វាក់​តម្លៃ​នៅក្នុង​វិស័យ​កសិកម្ម ជាពិសេស​ផ្នែក​បន្លែ ដែល​បាន​លេចធ្លាយ​នូវ​ទឹកប្រាក់​រាប់រយ​លាន​ដុល្លារ​អាមេរិក​ទៅ​ក្រៅ​ប្រទេស​។ ទីភ្នាក់ងារ​នេះបាន​កត់សម្គាល់​ថា ការប្រកួតប្រជែង​ដែល​បាន​បើក​ដំណើរការ​កាលពី​ថ្ងៃទី​ ២៤ ខែ កុម្ភៈ ឆ្នាំ​ ២០២១ នឹង​អាច​រកបាន​ជំនួយ​ឥតសំណង​ ៣,៥ ​លាន​ដុល្លារ​ដល់​ក្រុមហ៊ុន​ឯកជន​។ ទីភ្នាក់ងារ​នេះ​បន្តថា ក្រុមហ៊ុន​នានា​ក៏​តម្រូវ​ឱ្យ​ផ្ដល់នូវ​ដៃគូ​ហិរញ្ញប្បទាន​មួយ​ទល់នឹង​មួយ ហើយ​ធ្វើការ​ជាមួយ​វិស័យ​ឯកជន ដើម្បី​ឆ្លើយតប​នឹង​តម្រូវការ​បន្ទាន់​បំផុត​ក្នុង​ការទាក់ទង​នឹង​ប្រព័ន្ធ​រក្សា​ភាពត្រជាក់ លទ្ធភាព​ក្នុង​ការទុកដាក់​ឃ្លាំង​ និង​ផ្នែក​ភ័ស្ដុភារ​នៅក្នុង​វិស័យ​កសិកម្ម​។

ប្រភពៈ ព័ត៌មានកាសែតភ្នំពេញប៉ុស្តិ៍ចេញផ្សាយថ្ងៃអង្គារ ទី០២ ខែមីនា ឆ្នាំ២០២១


ក្រុមប្រឹក្សាអភិវឌ្ឍន៍កម្ពុជាអនុម័តគម្រោងវិនិយោគជាង $៧០០ លាន ក្នុងខែកុម្ភៈ

ភ្នំពេញ៖   រដ្ឋាភិបាល​កម្ពុជា​បាន​អនុម័ត​គម្រោង​វិនិយោគ​ដែលមាន​ទឹកប្រាក់​សរុប​ជាង​ ៧០០ ​លាន​ដុល្លារ​លើ​ ១៦ គម្រោង ក្នុង​ខែកុម្ភៈ ឆ្នាំ​ ២០២១ ​នេះ​ដោយ​បាន​បង្កើត​ការងារ​ថ្មី​ជាង​ ១ ​ម៉ឺន​កន្លែង បើទោះបី​ជា​ការរីករាលដាល​នៃ​ជំងឺ​កូវីដ​ ១៩ ​នៅតែ​តាម​យាយី​សេដ្ឋកិច្ច​កម្ពុជា​ក្នុង​តំបន់ និង​ពិភពលោក​ក្តី​។ របាយការណ៍​របស់​ក្រុមប្រឹក្សា​អភិវឌ្ឍន៍​កម្ពុជា (CDC) បានឱ្យ​ដឹងថា នៅក្នុង​ខែកុម្ភៈ ឆ្នាំ​ ២០២១ ​នេះ CDC បាន​អនុម័ត​គម្រោង​វិនិយោគ​ថ្មីៗ​ចំនួន​ ១៦ ដែលមាន​ទុនវិនិយោគ​ចំនួន ៧០២,៥ ​លាន​ដុល្លារ​បង្កើតបាន​ការងារ​ថ្មី​ចំនួន ១១ ៤១៤ ​កន្លែង​។ សម្រាប់​គម្រោង​វិនិយោគ​ថ្មី​ទាំង​ ១៦ ​នោះ​គឺ​ទៅលើ​ការបង្កើត​រោងចក្រ​ក្នុង​វិស័យ​កាត់ដេរ វាយនភណ្ឌ កាបូប រោងចក្រ​ផលិត​សម្បក​កង់​យានយន្ត រោងចក្រ​ផលិត​សាឡុង គ្រែ និង​គ្រឿងសង្ហារិម​គ្រប់​ប្រភេទ បង្កើត​រោងចក្រ​ផលិត​គ្រឿងបន្លាស់ (​រថយន្ត គ្រឿងចក្រ គ្រឿងយន្ត​) និង​ប៊ូឡុង​គ្រប់​ប្រភេទ គម្រោង​សាងសង់ និង​អាជីវកម្ម​មន្ទីរ​ពហុព្យាបាល​អន្តរជាតិ គម្រោង​បង្កើត​រោងចក្រ​ផលិត​សម្ភារបរិក្ខារ​សម្រាប់​ចង្ក្រាន BBQ, ផ្គុំ​ដំឡើង​បរិក្ខារ​អេឡិចត្រូនិក និង​អំពូល​ភ្លើង ដែល​មាន​ទីតាំង​វិនិយោគ​ស្ថិត​នៅក្នុង​តំបន់​សេដ្ឋកិច្ច​ពិសេស​ស្វាយរៀង ហ្គីហ្គា រីស៍ស និង​គម្រោង​បង្កើត​រោងចក្រ​ផលិត​ក្រដាស​។

ប្រភពៈ ព័ត៌មានកាសែតភ្នំពេញប៉ុស្តិ៍ចេញផ្សាយថ្ងៃអង្គារ ទី០២ ខែមីនា ឆ្នាំ២០២១


កម្ពុជា-ទីម័រ ប្តេជ្ញាបង្កើនទំនាក់ទំនងពាណិជ្ជកម្មទ្វេភាគី

ភ្នំពេញ៖   កម្ពុជា និង​ទីម័រ​ខាងកើត​បាន​បេ្តជ្ញា​ជំរុញ​សកម្មភាព​ពាណិជ្ជកម្ម និង​វិនិយោគ​រួមគ្នា​ឱ្យបាន​កាន់តែច្រើន​បន្ថែម​ទៀត​ ដើម្បី​បង្កើន​ទំហំ​ពាណិជ្ជកម្ម​ទ្វេភាគី​ឱ្យបាន​កាន់តែ​ច្រើន​។ ការប្តេជ្ញា​នេះ​ត្រូវបាន​ធ្វើឡើង​ក្នុង​កិច្ចប្រជុំ​រវាង​លោក ប្រាក់ សុខុន រដ្ឋមន្ត្រីក្រសួងការបរទេស និង​សហប្រតិបត្តិការ​អន្តរជាតិ​កម្ពុជា​ជាមួយ​លោកស្រី Adaljiza Albertina Xavier Reis Magno រដ្ឋមន្ត្រី​ក្រសួងការបរទេស និង​សហប្រតិបត្តិការ​អន្តរជាតិ​ទីម័រ​ខាងកើត​តាមរយៈ​វីដេអូ​អនឡាញ​កាលពី​ថ្ងៃទី​ ២៥ ខែកុម្ភៈ​។ នេះ​បើតាម​សេចក្តី​ប្រកាស​ព័ត៌មាន​របស់​ក្រសួង​ការបរទេស​កាលពី​ថ្ងៃ​សុក្រ​សប្តាហ៍​មុន​។ លោក សុខុន បាន​ថ្លែង​ក្នុង​សេចក្តី​ប្រកាស​ព័ត៌មាន​នេះ​ថា ភាគី​ទាំង ២ បាន​ពិភាក្សាគ្នា​ពី​បញ្ហា​ទ្វេភាគី​ទាំង​ក្នុង​តំបន់ និង​អន្តរជាតិ​ដែលជា​ប្រយោជន៍​រួម​ដោយ​ឯកភាព​គ្នា​ថា នឹង​ពង្រឹង​ និង​ពង្រីក​កិច្ចសហប្រតិបត្តិការ​ទ្វេភាគី​លើ​វិស័យ​ពាណិជ្ជកម្ម វិនិយោគ ទេសចរណ៍ ការអប់រំ និង​អភិវឌ្ឍ​ធនធានមនុស្ស​។

ប្រភពៈ ព័ត៌មានកាសែតភ្នំពេញប៉ុស្តិ៍ចេញផ្សាយថ្ងៃចន្ទ ទី០១ ខែមីនា ឆ្នាំ២០២១


  • វិស័យឯកជនរំពឹងលើភាពជាដៃគូរវាង NBC និង IFC ជំរុញហិរញ្ញប្បទានដល់ SME
  • ក្រសួង ២ ណែនាំម្ចាស់រោងចក្រត្រូវចុះបញ្ជីនៅគម្រោង BFC
  • កម្ពុជានឹងមានរោងចក្រផលិតសម្បកកង់យានយន្ត ដើម្បីផ្គត់ផ្គង់ក្នុងស្រុក និងនាំចេញទៅក្រៅប្រទេស
  • កម្ពុជានៅតែបន្ត រក្សាកំណើននៃការនាំចេញទៅកាន់ទីផ្សារចិនឆ្នាំមុន
  • ធនាគារជាតិនៃកម្ពុជា តម្រូវឲ្យប្រតិបត្តិករហិរញ្ញវត្ថុឯកជនផ្អាកបែងចែកភាគលាភ
  • ប្រេសិតពាណិជ្ជកម្មអង់គ្លេស សន្យាជួយលើកកម្ពស់វិស័យវិនិយោគ និងធុរកិច្ច
  • កម្ពុជាចង់ឃើញហ្វីលីពីន ប្រឡូកក្នុងវិស័យស្រូវអង្ករ
  • ពាណិជ្ជកម្មកម្ពុជា-ជប៉ុនធ្លាក់ ប៉ុន្តែសញ្ញាស្ទុះងើបឡើងវិញខ្លាំង
  • ការប្រមូលចំណូលពន្ធដារនៅក្នុងខែមករា ធ្លាក់ចុះជាង ៨ ភាគរយ
  • ក្រុមហ៊ុនចុះបញ្ជីនៅផ្សារហ៊ុនបានបង្ហាញពីប្រតិបត្តិការល្អប្រសើរនៅក្នុងឆ្នាំ ២០២០